రాజగోపాల్ ను ఎందుకు ప్రశ్నించకూడదు?

ముందుగా ఆనందిని గారి టపా ఆనందిని: నేను నా దీక్ష

చదివి .. నా టపా చదవవలసిందిగా సందర్శకులకు మనవి

ఆనందిని గారికి,
మీ టపాకి అభినందనలు.
"కెసిఆర్‌ నిజాయితీతో దీక్షను కొనసాగించారు." ఇది మీకే చిరాగ్గాలేదు చెప్పడానికి?

"విజయవాడలో ఒక్క మనిషి కూడా ఆయన్ను నిలదీసే సాహసం చేయలేదు.. ఆ దము్మలు లేవు ఎవరికీ.. లగడపాటి చర్యను విద్యార్థులైనా గట్టిగా ప్రశ్నించిన పాపాన పోలేదు.. ప్రజల్లోంచి.. తెలుగుతల్లి గర్భసంచిలోంచి పుట్టుకొచ్చిన ఉద్యమ స్ఫూర్తికి ఇంతకంటే తార్కాణం ఏముంది?"

మీరు విజయవాడ అని కొత్తగా సంబోధిస్తున్నారేమిటి? యావత్ ఆంధ్రప్రదేశ్ అనాలి. ఇక ప్రశ్నించడం విషయానికొస్తే, ఎందుకు ప్రశ్నించాలి? తెలంగాణా నాయకులు చెప్పినట్టుగా 2000 మంది గూండాలని విజయవాడ నుంచి వెనుకేసుకు రాలేదనా? లేక కెసిఆర్ లేదా హరీష్ రావు పురిగొల్పినట్లుగా జనాలని ఆత్మహత్యలకు ప్రేరేపించలేదనా? లేక మా దీక్షభంగం చేస్తే ఆత్మహత్యా దాడులకు పాల్పడటం లాంటి statements ఇవ్వలేదనా? లేక తలకాయలకు వెల కట్టలేదనా? లేక సమైక్యతను కోరుకుంటున్నందుకా? లేకా దీక్షాభంగం జరిగినా, జరగనట్టుగా supplements మీద ఆధారపడుతూ, కేంద్రం "ప్రక్రియ మొదలు పెడతాం" అనగానే ఒక్క ఉదుటున మంచం నుంచి దిగి దీక్ష విరమిస్తున్నానంటు, తెలంగాణా వచ్చేసిందంటూ తప్పుడు వాగ్దానాలు చేయలేదనా?

"..ప్రెస్‌క్లబ్‌కు వచ్చి తన చర్యలను సమర్థించుకోవటానికి నానా నానా తంటాలు పడి మరీ ఇబ్బంది పడి..జవాబులు చెప్పీ చెప్పక.. గాంధీనీ, ఫ్లూయిడ్‌‌సనీ, ప్రాచీన ఆధునిక దీక్షలనీ ప్రస్తావిస్తూ పాపం లగడపాటి విలేఖరుల సమావేశాన్ని ముగించారు.."
మరొక్క సారి మీరు తెలంగాణావాదులా, సమైక్యంధ్రా వాదులా అన్నది మరచి రాజగోపాల్ ఇంటర్వ్యూ చూడవలసినదిగా మనవి.

"ఆయన కుటుంబ సభ్యులే మానవహక్కుల సంఘానికి ఫిర్యాదుచేసి మరీ నిమ్‌‌సకు తరలించేలా చూసుకున్నారు.."
దీనికి సమాధానం నేను చెప్పక్కర్లేదనుకుంటాను.. మీరే చెప్పారు...

జయ తెలంగాణా పాట - అందెశ్రీ

సమైక్యాంధ్ర పై గజల్స్ శ్రీనివాస్ పాడిన పాట

నిర్మాత: లగడపాటి రాజగోపాల్

మేలుకొలుపు..

కె.సి.ఆర్.కు "బూతుల ధీర" బిరుదు ప్రదానం

      మీ హాస్య చతురతకు నా అభినందనలు.ముందుగా నేను తెలుగువానిగా పుట్టినందుకు గర్వపడుతున్నాను. మనం భావ వ్యక్తీకరణకు భాషను వాడతాం. భాషను మరొక అర్థం లో వాక్కు అని కూడా అంటారు. వాక్కుకు అధిపతి లేదా స్వరూపం సరస్వతి. తల్లికి సరస్వతికి మనం సమ గౌరవం, సమానార్ధం ఇస్తాం కాబట్టి "తెలుగు తల్లి" అన్నారు. ఇక తెలంగాణా తల్లి ఎలా వచ్చిందో నేను వివరించక్కర్లేదు అనుకుంటున్నాను. తెలంగాణా అని గిరి గీసుకున్న మాత్రమున సామాన్య మానవుడి కష్టాలు తీరిపోతాయంటే..అంతకంటే కావలిసిందేముంది. మన రాజకీయ నాయకుల గురించి ఎంత తక్కువ మాట్లాడుకుంటే అంత మంచిది. తెలంగాణా ప్రాంత నాయకుడు కావచ్చు లేదా ఆంధ్రా ప్రాంత నాయకుడు కావచ్చు లేదా మరొక నాయకుడు కావచ్చు. ఈ స్వతంత్ర భారత దేశంలో ఎవరి అభిప్రాయం వారు నిస్సందేహంగా వెలిబుచ్చవచ్చు. ఒకరు మేము తెలంగాణాకి వ్యతిరకం అన్నంత మాత్రమున లేదా మేము తెలంగాణాకి సానుకూలం అన్నంత మాత్రమున వారి మీద కక్ష కట్టటడం లేదా దాడి చేయడం ఖండించదగినది. ఎవరి అభిప్రాయాలూ వారివి.. కాదా? ఈ రోజున వరద తాకిడి వల్ల ఛిద్రమయిన బ్రతుకులని ఎవరయినా పట్టించుకుంటున్నారా? వరద వచ్చిన తర్వాత వివిధ రాజకీయ పార్టీలు, వివిధ సంస్థల విరాళాలు, విదేశాల నుంచి విరాళాల నిమిత్తం వచ్చిన డబ్బు ప్రజలనుంచి వసూలు చేసిన చందాలను వారికి సక్రమంగా అందాయా లేదా అని ఎవరికయినా సందేహం వచ్చిందా? కష్ట జీవులకు కావలిసింది.. నమ్మకం.. ఈ రోజు కాకపోయినా రేపు మన జీవనం మెరుగవుతుంది అన్న విశ్వాసం. అటువంటి నమ్మకం ఈ నాయకులలో ఒక్కరైన నాకు కలిగించారని అనుకోను. ఈరోజు మా ఇంటి అద్దె 6౦౦౦/-. రేపు తెలంగాణా వచ్చినా రాకున్నా నేను ప్రతినెలా చెల్లిన్చవలిసిందే. నేను తెలంగాణా వాడినైన మాత్రాన మా ఇంటి యజమాని(అతనూ తెలంగాణా వాడేలెండి) ఊరికినే ఇల్లు ఇవ్వడు కదా..! ఈరోజు పప్పు ధర ఒక కే.జి. 80/- (తక్కువలో తక్కువ). కోడి గుడ్డు రూ. ౩.50 /- ఎవరికి పట్టింది? మనం మనుషులమని మరచి చాలా రోజులయింది. నాయకుల చేతుల్లో కీలుబొమ్మలుగా మారి చాలా రోజులయింది. మరొక విషయం, "గాలి"వాటమేమయింది? తెలంగాణా అంశంతో కొట్టుకుపోయిందా? బ్రిటిష్ వారు దేశాన్ని వదిలి వెళ్ళిన తర్వాత, మనము సాధించిన విజయాలు వాటి నాణ్యతలను రంగాల వారిగా పరిశీలిస్తే మనం గర్వంగా చెప్పుకోదగ్గవి ఎన్ని? స్వదేశంలో మనమే ఇలా ప్రాంతాల వారిగా, కుల, మత ప్రాతిపదికగా, భాషా ప్రాతిపదికగా కొట్టుకుంటున్నప్పుడు, ఆస్ట్రేలియా లేదా విదేశాలలో భారతీయుల పైన దాడులు జరిగినప్పుడు ఖండించడంలో ఎంతవరకు అర్థం ఉందో నాకర్థం కాదు. మధ్య ఐరోపాలో 7 దేశాలు ఒకే నదీ జలాలను ఎటువంటి సమస్యా లేకుండా వాడుకుంటున్నాయి.  ఇక మన విషయం ప్రస్తావిన్చక్కర్లేదనుకుంటా.
        పూర్వపు తరం ఉద్యమ నాయకులకు, ఈ తరం ఉద్యమ నాయకుల స్పష్టమైన బేధం ఉంది..! లేదంటారా? మన నాయ"కుల"కు కావలిసింది వారి యొక్క రాజకీయ భవిష్యత్తు. ప్రజల కష్టనష్టాలు కాదు. ఎవరి ప్రాంతం మీద వారికి, ఎవరి భాష మీద వారికి అభిమనముండవచ్చు. కాని ఎదుట వ్యక్తిని సహించలేనంత దురభిమానముకూడదు. సమస్యల పరిష్కారము కోసం ప్రయత్నించవచ్చు. కానీ క్రొత్త సమస్యను కొనితెచ్చుకోవటం అవివేకమౌతుంది. ఒక బస్సు తగలపెడితే 5 -7 గురు నిరుద్యోగులవుతారు. వారు తెలంగాణా వారు కావచ్చు లేదా ఆంధ్ర ప్రాంతం వారు కావచ్చు లేదా మరే ప్రాంతం వారైనా కావచ్చు. ఈ రోజు ఆందోళనల్లో పోయిన ప్రాణాలకు బాధ్యత ఎవరిది? నష్ట పరిహారం చెల్లిస్తే సరిపోయినట్టేనా?
           జీవితపు నాణ్యత గురించి నాయకులను ప్రశ్నించండి. వేరొక రాష్ట్రం గురించి పోరాడమంటున్నారు సరే.. మరి వారి దగ్గర సరయిన ప్రణాళిక ఉందా? ఏదయినా సమస్యకు పరిష్కారం చూపించేటప్పుడు ఈ మౌలికమయిన అంశాలకు పరిష్కారాన్ని కూడా వివరిస్తే మాలాంటి అజ్ఞానులకు అర్థం అవుతుంది.  మా బ్రతుకుకు, మా బిడ్డల భవిష్యత్తుకు వారి దగ్గర సమాధానం ఉందా? లేక తెలంగాణా అని పేరు మార్చుకుని మురిసిపోవడమేనా?

గ్రుడ్డు చెట్టు..!!

అందరికీ దీపావళి శుభాకాంక్షలు..!!

ఈ గ్రుడ్డు చెట్టేమిటి అనుకుంటున్నారా..!! ఇది కోడిగ్రుడ్డు హోల్డర్ అన్నమాట. అన్నట్టు ఇది నేను సొంతంగా కష్టపడి చేసిందండీ.. నిజంది కాదండోయ్ యానిమేటెడ్. ఇంకా కాస్త కష్టపడి ఉంటే ఇంకా బాగా వచ్చేది. కాని ఈలోగా దీపావళి వెళ్ళిపోతుందని..

ఆ తల్లికి ఈ అల్పుడో నూలుపోగు..!

కరుణా కరుణం కాంతా కిరణం
మరకత మృదువాహినీ అభయభరణం
అమృతహస్త భూషణ విరచితం
వరలక్ష్మీ పాహిమాం పాహిమాం..!!

పై పంక్తులలో ఏమైనా వ్యాకరణ దోషాలుంటే క్షమించి తెలియ చేయవలసిందిగా సవినయంగా మనవి చేసుకుంటున్నాను. ఆ శారదాదేవి నాకు అనుగ్రహించిన నా భాషా శక్తి మేరకు ఆమెకు కృతజ్ఞతలు తెలియపరచాలని ఆరాటంతో అప్రయత్నంగా వ్రాసినది మాత్రామే అని మరొక్కసారి మనవి చేసుకుంటున్నాను.

విజయదశమి శుభాకాంక్షలు..!!

చెడు పై మంచి సాధించిన విజయాన్ని పురస్కరించుకుని విజయదశమి జరుపుకుంటారు. ఈ సందర్భంగా తోటి బ్లాగర్లకు నా విజయదశమి శుభాకాంక్షలు..!!

విశాఖ తీరంలో ఉదయభానుడు..

 

ఈ ఛాయాచిత్రం బాగా వచ్చిందో లేదో మీరే చెప్పాలి..

పల్లె భారతం - రెండవ భాగం

పల్లె భారతం- మొదటి భాగం

నేను వచ్చింది ప్రభుత్వ పని కావటం వల్ల నా బాధ్యతగా నేను ఏ గ్రామానికి వెళ్ళితే ఆ గ్రామ కార్యదర్శో లేక సర్పంచ్ పైనో ఆధారపడాలి గనుక నేను ముందుగా ఈ ఊరి గ్రామ కార్యదర్శి కోసం వాకబు చేయగా ఒకతను పాపం దగ్గరుండి కార్యదర్శి ఉండే ఆఫీసు చూపించాడు. అదొక చిన్న పెంకుటిల్లు. కొంచెం సందేహిస్తూనే లోపలికి అడుగుపెట్టాను. అక్కడ ముందు గదిలో బహుశా ౩౦ నుంచి 35 సం.ల వయసున్నావిడ కూర్చుని ఎవరితోనో మాట్లాడుతోంది. చూడగానే అర్ధమయ్యింది ఆవిడే ఈ గ్రామ కార్యదర్శి అని. కాదు.. కాదు.. కార్యదర్శి'ని' అని. నాకన్నా ముందు వచ్చిన వ్యక్తిని పంపి, అప్పుడు నాకేసి ప్రశ్నార్ధకంగా "మీరూ...!!?!" అని చూసింది. అప్పుడు నన్ను నేను పరిచయం చేసుకుని, నేను వచ్చిన పని సదరు తాలూకు వ్యవహారం అంతా ఆ గ్రా.కా.నికి వివరించడం మొదలుపెట్టాను.
నేను సదరు గ్రామ కార్యదర్శినితో మాట్లాడుతుండగా ఒక వ్యక్తి వచ్చాడు. అప్పడు, గ్రా.కా.ని అతనితో "ఏం నారయ్యా.. ఎలా ఉన్నావ్? జ్వరం ఎలా ఉంది? నిన్న ఇచ్చిన మందు బిల్లలేసుకున్నావా?" అని అడిగింది. అప్పుడతను నాకేసి ఇతనెవరా అన్నట్లుగా చూసి, "ఆఁయ్, నిన్న సందాల తమరిచ్చిన బిళ్ళ లేసుకున్నానండి, కొంచెం ఈ మద్దేలనించే లేచి తిరగ్గలుగుతున్నానండి. ఇంకా కొంచెం నీరసంగా ఉందండి." అన్నాడు తన చేతిమీద ఉన్న పుండును ఏదో చూసుకుంటూ. నారయ్యనే పరీక్షగా చూస్తున్ననాతో గ్రా.కా.ని, నారయ్య ముందే ఇలా చెప్పడం మొదలెట్టింది.
"వీడి పేరు నారయ్య. వీడికో పెళ్ళాం, పిల్లా ఉన్నారు. వీడికి ఎయిడ్స్ మూడవ స్టేజిలో ఉంది. రోజూ వస్తాడు నా దగ్గరికి. కాని ఏవో బి-కాంప్లెక్స్ టాబ్లెట్లు ఇచ్చి పంపుతుంటాను." నాకు ఆఖరి వాక్యం వినగానే ముందుగా కొంచెం భయం వేసింది, తర్వాత అతని మీద జాలి వేసింది. నాకు ఆశ్చర్యం వేసింది, ఈమేంటి ఇంత సింపుల్ గా చెప్తోంది ఇతనికి ఎయిడ్స్ అని, అనుకున్నా. నిజం చెప్పాలంటే నేను ఎయిడ్స్ పేషెంట్ ని చూడడం అదే ప్రధమం.
ఆమె మళ్లీ నారయ్య వైపుకి తిరిగి "ఇవిగో ఈ మందులేసుకో. జ్వరం తగ్గే వరకు నీ పెళ్ళాం దగ్గరకి వెళ్ళకు.." అని ఒక కాగితంలో చుట్టిన కొన్ని మందు బిళ్ళలు అతని చేతిలో పెట్టింది. "చిత్తం.. అట్టాగేనండి.. ఇక ఉంటానండి.." అంటూ అతను నిష్క్రమించాడు.
ఆవిడకి నేను వచ్చిన పని, చేయబోయే సర్వే గురించి చెప్పడం పూర్తయిన తర్వాత ఆవిడ అంగీకారప్రాయంగా తలూపుతూ ఎక్కడికో బయలుదేరటానికి అన్నట్లుగా తన సరంజామా అంతా ఒక మెడికల్ రిప్రజంటేటివ్ కిట్ లాంటి బ్యాగ్ లో వేసుకుంటూ, కుర్చిలోంచి లేచి, "మీరూ నాతో రండి నేను ఇంకొంచెం సేపట్లో రౌండ్స్ కి వెళ్ళాలి, మిమ్మలిని ఇక్కడ మహిళా సంఘం లీడర్ కి పరిచయం చేసి వెళ్తాను. మీరుండడానికి బస, భోజనం అన్ని ఏర్పాట్లూ వాళ్ళే చూస్తారు. మిమ్మలిని భోజన సమయానికి కలుసుకుంటాను." అని చెప్పి, ఆ ఇంటికి ప్రక్కగా ఉన్న చిన్న సందు ద్వారా వెళ్లి, వెనుక వీధిలో కుడి వైపు మూడో ఇంటి ముందు ఆగింది. నేను మారు మాట్లాడకుండా ఆవిడనే అనుసరించాను.
ఉన్నట్టుండి వీధిలోంచే గట్టిగా ఆమె ఆ ఇంటివైపు చూస్తూ "సత్యవతిగారూ..!! సత్యవతిగారూ..!!" ఉన్నారా? అంటూ అరవడం మొదలుపెట్టింది.
"ఆ..ఆ.. వచ్చే.. వచ్చే.. ఎవరదీ? " అంటూ ఆ ఇంట్లోంచి ఎవరో ఆడమనిషి రావడం గమనించా.
"ఈ సారు ఏదో పని మీద వచ్చారట ఒక పదిరోజులు ఇక్కడే ఉండాలట బస ఏమైనా ఏర్పాటు చెయ్యగలవా?"
అని అడిగింది ఆ మనిషిని గ్రా.కా.ని.
(ఇంకా ఉంది)

శ్రామిక జీవి

మిట్ట మధ్యాహ్నం ఎండలో, మాడు పగిలే వేడిలో
చెమట నెత్తురు క్రక్కుతూ, బ్రతుకు తెరువుకు వేరే దారిలేక
అధికధరల భారముతో, బ్రతుకు భాద్యతల వలయంలో
గ్రుక్కెడైనా పప్పు నీళ్ళకు గతిలేక
ఏ పాపమూ తెలియని, ఏ విధముగా సంబధములేని నువ్వు
ఆర్ధికమాంద్య పిశాచి కరువు కోరలకి బలౌతున్నా ఎటువంటి ఫిర్యాదూ చేయక
మొక్కవోని దీక్షతో బాధలన్నీ పంటి బిగువున త్రొక్కిపట్టి ఎదురీదుతున్న..
ఓ శ్రామిక జీవీ .. !

నీకు నా జోహార్లు..!!!

పల్లె భారతం

పల్లెలు భారతావని పట్టుగొమ్మలు అని ఒక మహానుభావుడు సెలవిచ్చాడు. మరి ఈనాటి మన పల్లెల పరిస్థితేమిటి?
మన పల్లె వాతావరణం కూడా ఈ ప్రాశ్చాత్యాగ్నికి ఆహుతయిపోతోందా? చదవండి..

బహుశా రాజమండ్రి పేరు అందరూ వినే ఉంటారు. ప్రసార మాథ్యమాల పుణ్యమా అని మంచికి కాకపోయినా చెడుకి. ఈ రాజమండ్రి ప్రక్కనే ఒక పది కిలోమీటర్ల దూరంలో కొండ గుంటూరు అనే చిన్న పల్లె. ఈ పల్లెలో మహా అయితే ఒక ౩౦౦ల ఇళ్ళు ఉంటాయ్. జిల్లా వ్యాపార రాజధానికి ఈ గ్రామం దగ్గరలో ఉన్నాఇక్కడికి చేరడం అంత సులువు కాదండి. మన రాష్ట్ర రోడ్డు రావణ (రవాణా) సంస్థ వారి గురించి చెప్పేదేముంది. అవసరమైన సర్వీసులకన్నా అనవసరమైన సర్వీసులతో ఆడుకుంటారు. రాష్ట్ర రాజధాని దగ్గరి ఊళ్లకే దిక్కులేదు ఇక ఈ పల్లె ప్రత్యేకత ఏమిటిట అని మీకు సందేహం కలగవచ్చు. ఈ గ్రామానికి దురదృష్టవసాత్తు ఏ ప్రత్యేకతా లేదు కదా.. పోనీ మా గ్రామానికి "ఇది కావాలి.." అని పోరాడేవారు ఎవరూ లేరు. ఈ పల్లె లో ఉండే జనాలు ఇక ఈ విషయం మీద ఫిర్యాదు చెయ్యడం మానేసారు. నాయకులకన్నా తమ పిక్కబలాన్ని నమ్ముకోవడనికే అలవాటు పడ్డారు. ఈ గ్రామానికి మనుష్యులు ఎంతో కష్టపడి వెళ్తూ ఉంటారు..కానీ కష్టాలు మాత్రం సులువుగా వెళ్తాయి. ఈ గ్రామానికి ఒక గ్రామ కార్యదర్శి(Village Assistant), సర్పంచి ఉన్నారు. నేను ఒకానొక సందర్భం లో ప్రభుత్వ కుటుంబ సర్వే నిమిత్తం వెళ్ళినప్పుడు నేను కొన్ని విషయాలని చూసి చలించిపోయాను. అప్పటికి నేను ఆ గ్రామంలో అడుగు పెట్టి ఒక గంట అవుతుందేమో. ఈ గంటలో నాకు మెదడులో మొదటి అనుమానం.. ఏంటి ఇంకా ఈ పల్లెలో వాళ్ళు 16వ శతాబ్దంలో ఉన్నారా అని. ఈ గ్రామానికి అత్యవసరమైనది, అందుబాటులో లేనిది ఆసుపత్రి. ఇక్కడి వాళ్ళు ఎంత అమాయకులంటే, వీరికి జబ్బుల గురించి పెద్దగా అవగాహనా లేదు లేదా రాజమండ్రికి పోయి పెద్ద వైద్యుడి దగ్గరికి వెళ్లి చికిత్స చేయించుకునే స్ధోమత అంతకన్నా లేదు. వీరికి ఏదైనా జబ్బు చేస్తే గ్రామ కార్యదర్సి దగ్గరికి వెళ్లి చూపించుకుంటారు. సదరు గ్రామకార్యదర్శి ఎంత చెపితే అంత. వీరికి జ్వరానికి, ఎయిడ్స్ కి పెద్ద తేడా తెలీదు అంతటి అమాయకులు. భారతదేశం వెలిగిపోతోంది అన్నారట ఎవరో..!! నాకు నవ్వొచ్చింది. నేను నిఖచ్చిగా చెప్పగలను మన దేశంలో 90% పల్లెలది ఇదే పరిస్థితి. కానీ గుడ్డిలో మెల్లలా నా మొబైల్ కవరేజ్ మాత్రం బానే ఉంది.

(ఇంకా ఉంది)

మామ.. చందమామ..

పై ఫోటో చూసారా..? 1969వ సం. లో చందమామ మీదకి ఆర్మ్ స్ట్రాంగ్ వెళ్ళినప్పుడు తీసిన ఫోటో అన్నమాట.. ఈ ఫోటో చూస్తే నిజంగా జాబిల్లి మీదకి వెళ్ళినట్టు లేదూ ?? మొన్నీమధ్యే ఈ ఫోటోలని నాసా వాళ్ళు డిజిటలైజ్ చేసి నేషనల్ జియోగ్రాఫిక్ ఛానల్ వాళ్లకిస్తే నేను సరిగమ పదనిస అనిపించేసా అంతే.. ఎంతైనా ఏదైనా కొత్తగా పుట్టించాలంటే సమయం కావలిగానీ.. ఇలాంటివైతే చిటికెలో చేసి పారెయ్యామూ...!!!

మళ్ళీ సాలిగూడులోకి..

అవునండి.. మళ్ళీ సాలిగూడులోకి వచ్చి పడ్డానండి. ఎన్నాళ్ళయ్యింది ఈ సాలిగూడులో కబుర్లు చెప్పి. ఏంటి ఈ సాలిగూడు సొల్లు ఏమిటా అనుకుంటున్నారా? అదేనండి "web" దీన్నే కొంచెం మన తెలుగులో సోగ్గా సాలిగూడు అన్నానన్నమాట. ఇక పొతే.., ఎవరు? అని అడగకండి. పోయిన సంవత్సరం "నాదొక కల" అని టైటిల్ పెట్టి కొంచెం కధ చెప్పి వదిలేసాలెండి. దానిని ఏ ముహూర్తం లో మొదలుపెట్టానో కాని ఆ కధ నాకొక కలగా మిగిలిపోయింది. దానిని పూరించటానికి నాకు కొంచెం సమయమివ్వమని కోరుతూ అసలు విషయానికి వస్తాను.
అమెరికా వారి పుణ్యమా అని మన జీవితాలు నాలుగు లే-ఆఫ్ లు ఆరు జీతాల కోతలు కింద తయారయ్యిందని ఇప్పుడు నేను కొత్తగా మనవి చేసుకోనక్కర్లేదనుకుంటున్నాను. ఒకానొక దశలో నాకు ఏమి చెయ్యాలో తోచక ఈ ప్రపంచం లో ఎక్కడైనా మంచి జరుగుతోందా అని ఆలోచించటం మొదలు పెట్టా. ఏమిటీ, నవ్వుతున్నారా? అవున్లెండి కంప్యూటర్లు వచ్చాక జనాలెక్కడ ఆలోచిస్తున్నార్లెండి! నేను మాత్రం తక్కువ తిన్నానా? నేను గూగుల్ చేశా.. నా పిచ్చి కాకపొతే ఎవరికైనా మంచి జరిగితే అది సాలిగూడు లో ఎందుకు దొరుకుతుంది?? అదే చెడు జరగితే మాత్రం నిమిషాలలో ప్రపంచమంతా పాకిపోతుంది. కొందరికి చెడ్డ వార్తలంటే ప్రాణం. ఎంత దూరమైన మోసేస్తారు. అదే ఒకరికి మంచి జరిగిందటే మాత్రం కుళ్ళి కుళ్ళి ఏడ్చి దుఖంతో పాటు ఆ విషయాన్నీ మింగేస్తారు.

అన్నీ సవ్యంగా ఉంటే జీవితం లో ఆనందమేముంటుంది చెప్పండి. బోర్ కొట్టదూ? అందుకే కష్టం వచ్చినప్పుడు కుంగిపోక, సంతోషం వచ్చినప్పుడు పొంగిపోక సహనంతో రెండిటిని ఓకే విధంగా తీసుకోగలిగితే అసలు సిసలు జీవితానందం పొందవచ్చని అనుభవ పూర్వకముగా మనవి చేసుకుంటున్నాను.

అసలు విషయం మర్చిపోయా మీరు కూడా గూగుల్ ప్రయత్నించండి ఈ ప్రపంచంలో ఎక్కడైనా మంచి జరుగుతోందేమో తెలుసుకోండి.. Believe me,you will definitely feel good.. పరభాష ఉపయోగించినందుకు క్షమించండి..

మళ్లీ కలుద్దాం..